22 أوت 2011 أصعب لحظة في حياتي ، حكيتها برشا مرات نحسو كاينو فيلم ونعاود نتذكرو في مخي بالثانية والدرج والساعة ...
السهرية كاملة حافظها بتفاصيلها وين تعشينا ومشينا للقهوة ، هو دخل للقهوة بدى يتقلق وعرق... أنا خواف بحكم نحبو ياسر ، نخاف عليه ديما ، أنا وقتها عمري 17 سنة ... مشينا لكلينك المرسى دخل للبيت وأحنا قعدنا لبرا ، هوما فهموها وسكروا الباب ...
مبعد خرج ومشى للتوالات واخر كلمة قالها "يا مرا عين" ، دخل سكروا الباب وأنا قعدت لبرا بديت نبكي هو احساس متاع حاجة خايبة باش تصير ...
أصعب لقطة حضرت عليها ، أنا قدام الباب الطبيب داخل حل الباب شويا وشفتو كيف طلع الروح ، نشوف فيه كيفاش يتهز قدامي ونغزرلو قدامي وسكروا الباب وليت نضرب نحب نحلو ...
خرج الطبيب قال مانجمناش نعملوا حتى شي الله غالب ، نتذكر روحي دخت وقمت نلقى روحي في بيت في الكلينيك دايرين بيا لعباد الكل فيبالي حلمة ، حبلي وقت باش نستوعب إلي صار صحيح... اللقطة الأخيرة هذيكا مازالت في مخي لتوا نرى فيها قدامي
Tags:
منوعات