في تصريح مهم لوكالة تونس إفريقيا للأنباء، أعلن عالم الفضاء التونسي نور الدين الروافي إن تونس باش تعيش حدث فلكي نادر ومميز يوم 2 أوت 2027، يتمثّل في كسوف كلي للشمس، يدوم تقريباً 6 دقايق، وهي مدة طويلة مقارنة بمعظم الكسوفات اللي صارت في العالم.
الروافي أكّد إن الحدث هذا ما يهمّش تونس وحدها، بل باش يكون محطّ أنظار العالم الكل، ومعاه متوقّع توافد عدد كبير من السياح باش يجيو يشاهدو الظاهرة الفلكية هاذي مباشرة من بلادنا.
وقال بالحرف: "الكسوف هذا هدية من الطبيعة، لكن لازم نستعدولو من توّا، ونخدمو عليه كيما يلزم، كيف ما عملت دول أخرى استفادت من الظواهر هاذي وسوّقت روحها للسياحة."
وشدّد عالم الفضاء على أهمية الترويج المبكّر للحدث، خاصة من ناحية السياحة والبنية التحتية، من نزل، ووسائل نقل، وتنظيم أمني، باش تونس تكون حاضرة وتستغل الفرصة كيف ما يلزم.
وأوضح زادة إن الكسوف باش يشمل بلدان أخرى كيما إسبانيا، المغرب، والجزائر، لكن باش يكون عندو أهمية خاصة في تونس، باعتبار موقعنا الجغرافي اللي يسمح برؤية أوضح وأطول للظاهرة.
وختم الروافي حديثو بتفسير مبسّط للظاهرة: "الكسوف يصير وقتلي يكون القمر بين الأرض والشمس، في موقع معيّن، وهاد النوع من الكسوف نادر يصير مرّة كل عشرات السنين.. وعلينا ما نضيعوش الفرصة."
Tags:
علوم